சிலுக்கை கடித்த கொசுக்களும், கோடம்பாக்கத்தில் மிரட்டலும்…

சிலுக்கை கடித்த கொசு கோடம்பாக்கத்தை விட்டு நகராதல்லவா? அப்படிதான் ஆகிவிட்டது இந்து மக்கள் கட்சி என்ற ஒரு கட்சியின் நிலைமை. கோடம்பாக்கத்தையும் வடபழனியையும் சுற்றி சுற்றியே கட்சி நடத்தி கதையை ஓட்டி விடுவார்கள் போலிருக்கிறது. சினிமாவுக்குள் எது நடந்தாலும் முதலில் வேர்ப்பது இவர்கள் மூக்குதான். இதே பிரச்சனை வேறொரு அரசியல்வாதி ஏரியாவில் நடந்தால் இவர்கள் மூச் காட்டமாட்டார்கள். 

அப்படி ஒரு சம்பவம் நடந்ததை கூட வெளிக்காட்டிக் கொள்ள மாட்டார்கள். (சென்னையே புழுதி மயமாகிக் கிடக்கிறது. சாலைகள் அத்தனையும் வேஸ்ட் என்கிற நிலைமை. ஒரு முறையாவது அறிக்கை கொடுத்திருப்பார்களா இவர்கள்?) 

சினிமாவை தொட்டால்தான் விளம்பரம் என்பதை மிக சரியாக புரிந்து வைத்திருக்கும் இவர்கள் இந்த முறை வேர்த்திருப்பது எதனால்? கோச்சடையான் படத்தில் ரஜினிக்கு ஜோடியாக அசின் நடிக்கப் போகிறார் என்றொரு பத்திரிகையில் செய்தி வந்திருக்கிறது. அசின் இலங்கைக்கு சென்று வந்தவர். அதனால் அவரை இந்த படத்தில் ஒப்பந்தம் செய்யக் கூடாது. 

அப்படி செய்தால் ரஜினி வீட்டுக்கு முன்பு போராட்டம் நடத்துவோம் என்று உடனே ஆஜர் கொடுத்துவிட்டார்கள் இவர்கள். 

தொல்.திருமாவளவன் சினிமாவில் நடிக்க வந்தபோது, இனிமே எங்க தலைவர்தான் நடிகர் சங்கத்திற்கும் தலைவர் என்று அவருக்கே தெரியாமல் கொக்கரித்தார்கள் அவரது அடிப்பொடிகள். அதெல்லாம் எப்படி நடக்காமல் போனதோ, அப்படிதான் அமையும் இதுபோன்ற மின்மினிப்பூச்சி ஐடியாக்கள் எல்லாம். 

புரிந்து கொள்ளுங்கள் பிரதர்ஸ்…