வருங்காலத் தொழில்நுட்பம் 93 - டிரெண்ட் 2012

2012 குளிகைகளின் வருடமாக இருக்கும். இந்த டிரெண்ட் சில வருடங்களுக்கு நீடிக்கும். எப்படிச் சொல்கிறாய் அண்டன் என்று கேட்கிறீர்களா?

இந்த வாரத்தில் நடந்திருக்கும் பல சம்ப வங்களை அடிப்படையாக வைத்துத்தான் சொல்கிறேன்.

சர்வதேசச் சந்தை தகவல் நிறுவனமான ஐ.டி.சி. (International Data Corporation) இந்த வாரத் தில் வெளியிட்டு இருக்கும் டெக் இண்டஸ்ட்ரி பற்றிய ரிப்போர்ட், கடந்த மூன்று மாதங்களில் உலகளாவிய குளிகைக் கணினி விற்பனை 90 சதவிகிதம் அதிகரித்து இருக்கிறது என்கிறது. கடந்த வருடத்துடன் ஒப்பிடுகையில், இது 400 சதவிகிதம் அதிகமாம்!

மைக்ரோ சாஃப்ட் நிறுவனம் 'விண்டோஸ் 8’ (Windows - 8) என்ற பெயரில் தங்களது இயங்கு பொருளை (Operating System) வெளியிடப்போவதாக அறிவித்து இருக்கிறது. 2012 ஜனவரி வாக்கில் நுகர்வோருக்கு விற்கத் திட்டமிடப் பட்டுள்ள இந்த இயங்குபொருள் அலைபேசி மற்றும் குளிகைக் கணினிகளை மனதில்கொண்டு வடிவமைக்கப்பட்டு இருக்கிறது என்கிறது மைக்ரோசாஃப்ட். மொபைல் சாதனங்களின் முக்கியத் துவத்தைப் பல வருடங்களுக்கு முன்னரே உணர்ந்துதான் இருக்கிறது மைக்ரோ சாஃப்ட். ஆப்பிளின் ஐ-போன், ஆர்.ஐ.எம்மின் பிளாக்பெர்ரி (RIM Blackberry போன்றவை வருவதற்கு முன்னரே 'விண்டோஸ் சி.இ.’ (Windows CE) என்ற இயங்குபொருளை வெளியிட்டது. இந்த மென்பொருள்தான் மைக்ரோ சாஃப்ட் தயாரிக்கும் பல்வேறு மொபைல் சாதனங்களை இயக்க இன்றும் பயன்படுகிறது. ஆனால், நுகர்வோரிடம் மைக்ரோ சாஃப்டின் மொபைல் சாதனங்கள் பிரபலம் ஆகவில்லை. கணினிகளை இயக்கும் இயங்குபொருளான விண்டோஸ் என்பதை மட்டுமே அடிப்படையாகக்கொண்டு தங்களது எல்லாத் திட்டங்களையும் செய்வதுதான் இதற்கு முக்கியக் காரணம்.

மேசை/மடிக்கணினி என்பது தொடர்ந்து மக்களிடம் முக்கியத்துவம் வாய்ந்ததாகவே இருக்கும் என்ற நம்பிக்கையில் இருந்தார்கள். அவர்களது வணிக அடிநாதம் 'விண்டோஸ்’ மென்பொருள். அதைப் பல்வேறு விதங்களில் விற்பதுதான் சாமர்த்தியமானது என்ற நினைப்பில் இதுவரை இருந்து வந்த பூனைக்கு மணி கட்டியது ஆப்பிளின் ஐ-போன். அதைத் தொடர்ந்து ஐ-பேட். அது மட்டும் அல்லாமல் கூகுளின் ஆண்ட்ராயிடால் இயங்கும் குளிகைகள் சரமாரியாக வெளியிடப்பட, இவற்றின் விளைவில் கணினிகளின் சந்தை கலகலத்துப் போய் இருப்பது கணினிகளை விற்கும் நிறுவனங் களின் பங்குச்சந்தை மதிப்பு வீழ்ச்சியில் தெரிகிறது. சுதாரித்துக்கொண்ட மைக்ரோ சாஃப்ட் மொபைல் சாதனங்களை இயக் குவதே 'விண்டோஸ் 8’ மென்பொருளின் அடிப்படை வடிவமைப்பாக இருக்கும்!

ஃபிலடெல்பியா டெய்லி நியூஸ் (Philadelphia Daily News) என்ற செய்தித்தாள் நிறுவனம் மலிவான விலையில் நீண்ட கால சந்தாதாரர்களுக்கு அவர்களது நிறுவனத்தின் பெயரில் ஆண்ட்ராயிடில் இயங்கும் குளிகைக் கணினிகளை வழங்கப்போவதாக இந்த வாரம் அறிவித்து இருக்கிறது. பாரம் பரிய அச்சு ஊடகங்கள் இணையத்துக்கு நகர்ந்துகொண்டு இருப்பது அனைவருக்கும் தெரிந்த ஒன்றுதான். எனினும், ஊடக நிறுவனம் ஒன்று தங்களது செய்திகளையும் விளம்பரங்களையும் நுகர்வதற்கு வசதியாக குளிகையையே கொடுப்பது இதுதான் முதல் முறை. இந்தப் பழக்கம் பல ஊடக நிறுவனங்களால் பின்பற்றப்படும் என்பது உறுதி.

ஆப்பிளின் ஐ-பேடுக்குப் போட்டி யாக இருக்கும் என்று பரபரப்பாகப் பேசப்படும் அமேசானின் கிண்டில் குளிகை, ஐ-பேடைவிடப் பாதி விலை என்று டெக் இண்டஸ்ட்ரி யில் தற்போது உலா வரும் வதந்தி உண்மையாக இருந்தது என்றால், அதிகமான பயனீட்டாளர்கள் குளிகைக்கு மாறி விடுவதைக் கணிக்க முடியும். இந்த வருடக் கடைசியில் கிண்டில் குளிகை வெளிவருகிறது.

டெக் உலகம் படு வேகமாக மாறி வருவதில் வசதிகளும் சிக்கல்களும் ஒருசேர வருவதைத் தடுப்பது எளிது அல்ல. உதாரணத்துக்கு, அலை பேசும் தொழில்நுட்பத்தையே எடுத்துக்கொள்ளலாம். 10 வருடங்களுக்கு முன்னால், மற்றவர்களுடன் தொடர்புகொள்ள தொலைபேசியை மட்டுமே பயன்படுத்தினோம். தொலைபேசி இருக்கும் இடத்துக்கு நாம் செல்ல வேண்டும் என்பது மாறி, நாம் இருக்கும் இடத்துக்கு எல்லாம் அலைபேசி வர முடியும் என்பது வசதியைக் கூட்டி இருப்பது உண்மை தான்.

அதே நேரத்தில், நாம் செல்லும் இடத் துக்கு எல்லாம் அலைபேசியின் பேட் டரியை சார்ஜ் செய்துகொள்ள வேண்டும் என்பது சிக்கல். பயணம் செய்கையில் அலைபேசியை சார்ஜ் செய்ய அவதிப்படுவது நம்மில் பலருக்கும் நிகழ்ந்திருக்கும். அப்படி இந்தக் குளிகைகளின் குறைபாடு என்ன? எப்படி அதைக் கடந்து வருவது? பார்க்கலாம்!

முகப்புத்தகப் புழுக்கள் - பேஸ்புக்குக்கு அடிமையாகும் பயனர்கள்.

உலகம் முழுதும் பெருவளர்ச்சி கண்ட சமூக வலைத்தளம் ஃபேஸ்புக்.கணினி பயன்படுத்துபவர்கள் தினமும் பார்க்காதவர்கள் குறைவு. பல குழுக்கள் இருக்கின்றன.குருதிக் கொடையாளர்களுக்கு குழுக்கள் உள்ளன.சமூகப் பிரச்சினைகளை பேச,வாசகர் வட்ட்த்திற்கு,சினிமா ரசிகர்களுக்கென்று பல குழுக்கள்.ஏராளமான நல்ல விஷயங்கள் இதில் உண்டு.பதிவுகள் உள்பட பல தகவல்கள் ஏராளமானவர்களை சென்றடைகின்றன.

இன்று பேஸ்புக் இல்லாமல் வாழ்க்கை இல்லை என்றும்,அடிமையாக மாறிவருவதாக பலர் சுட்டிக் காட்டி வருகிறார்கள்.நண்பர் ஒருவர் பகிர்ந்து கொண்ட விஷயம் இது.அலுவலகத்தில் வேலை செய்யாமல் பேஸ்புக்கில் இருந்திருக்கிறார் ஒரு ஊழியர்.வேலை செய்யுமாறு அலுவலர் சத்தம் போட்ட்தும் பாத்ரூம் சென்று வருவதாக சென்றுவிட்டார்.

பாத்ரூம் சென்றவர் இரண்டு அறை தாண்டி இருக்கும் இன்னொரு அலுவலகத்தில் கம்ப்யூட்டர் முன்பு போய் உட்கார்ந்து விட்டார்.அலுவலகப் பணிகளுக்கு இது ஒரு பிரச்சினையாகவே இருக்கிறது.பொது மக்கள் போய் ஏதாவது கேட்டாலும் எரிந்து விழுகிறார்கள்.கிட்ட்த்தட்ட கட்டிப்போட்டு விட்ட்து.

பிரௌசிங் செண்டரில் அதிகம் பார்க்கப்படுவது பேஸ்புக் என்கிறார் ஒரு உரிமையாளர்.”சோறு,தண்ணிகூட வேண்டாம் சார்,சிலருக்கு பேஸ்புக் இருந்தால் போதும்.” என்றார்.சர்வர் பிரச்சினை போன்ற காரணங்களால் இணைய இணைப்பு கிடைக்காத போது பலர் எரிந்து விழுகிறார்கள்.வரும்போதே உடலும்,மனமும் பரபரக்கத்தான் வருவார்கள்.

ஒரு பழக்கத்தை விட முடியாமல்’’’’”’ “இல்லாவிட்டால் உடலும் மனமும் பாதிக்கப்படும் நிலை அடிமையாகி விட்ட்தைக் குறிக்கும்.பேஸ்புக்தான் என்றில்லை,வலைப்பதிவுக்கு கூட ஒருவர் அடிமையாக முடியும்.நாம் கற்றுக்கொண்ட பழக்கம் நம்மை ஆளும் நிலைதான் அடிமைத்தனம்.மதுவுக்கு,போதைப்பழக்கத்துக்கு,புகைப்பழக்கத்துக்கு அடிமையானவர்கள் இருக்கிறார்கள்.

மதுவுக்கு அடிமையானவர்கள் தினமும் குறிப்பிட்ட நேரத்துக்கு குடிக்காவிட்டால் முடியாது.மனம் அமைதி இழக்கும்.விளைவாக உடலில் மாற்றங்கள் உருவாகும்.எரிந்து விழுவார்கள்.எப்படியாவது,எப்படியாவது என்று மனம் தேடும்.பேஸ்புக் போன்றவையும் இப்படி அடிமையாக்க முடியும்.மேற்கண்டவாறு மனதிலும்,உடலிலும் மாற்றங்கள் உருவானால் அடிமையாகி விட்டார் என்பதே பொருள்.

சமூகத்தில் பேஸ்புக் பயன்படுத்துவதை யாரும் குறை சொல்ல மாட்டார்கள்.ஆனல் ஒருவர் அடிமையாகி விட்டாரா என்பதை கிடைக்காத்போதுதான் தெரிந்து கொள்ள முடியும்.சொந்தமாக கம்ப்யூட்டர்,இல்லாவிட்டால் செல்போன் இருக்கிறது.அதனால் எளிதில் நமக்கு தெரியாது.எப்போதும் கிடைப்பதால் பிரச்சினை சீக்கிரம் வெளியில் தெரியாது.

பேஸ்புக்கின் அரட்டைகளுக்கு அடிமையாகிப் போனால் பெண்ணுக்கு திருமணத்திற்கு பின்னால் பிரச்சினையாக முடியலாம்.எந்த பழக்கமும் நம்மை ஆளாமல் நாம் அதனை ஆள வேண்டும்.முடியாத நிலையில் தயங்காமல் ஆலோசனை பெறலாம்.கொஞ்சம் கொஞ்சமாக குறைத்துக் கொள்ளலாம்.எந்த சமூக வலைத்தளங்களையும் நல்ல நோக்கத்திற்காக பயன்படுத்துபவர்கள் அடிமையாக வாய்ப்பில்லை.

செல்போன் எனும் பூதம்!

செல்போன் இன்றி நானில்லை

SMS அனுப்பாமல் இருப்பதில்லை

எனக்கொரு செல் இருக்கிறது

அது எனக்கே வில்லன் ஆகிறது..

(கத கேளு கத கேளு... சோகமான கத கேளு...)

"எங்க வீதியிலையே ராசாத்தி மாதிரி அழகா இருக்குறது என் மக மட்டும்தான். ரொம்ப விவரமான பொண்ணு. 'நான் உன்ன லவ் பண்றேன்னு’ சொல்ற பசங்ககிட்ட கூட பேசி அட்வைஸ் பண்ணி ஃப்ரண்ட்ஸ் ஆக்கிக்குவா. ஆனா கொஞ்ச நாளா என்னமோ ஆயிடுச்சு அவளுக்கு. எங்ககிட்ட சரியா பேச மாட்டேங்கறா.. என்ன ஆச்சுன்னு கேட்டா 'என்ன தனியா விடுங்க...ப்ளீஸ்னு’ எரிஞ்சு எரிஞ்சு விழுறா!"

"என் மகன் தம் அடிக்க மாட்டான், தண்ணி அடிக்க மாட்டான், பொம்பளப் பிள்ளைங்களை ஏறெடுத்தும் பாக்க மாட்டான். ஆனா, கொஞ்ச நாளா அவனோட நடவடிக்கைகளே சரியில்லை. ராத்திரி பூராவும் அவன் ரூம்ல பளிச் பளிச்னு விளக்கு எரியுது, அணையுது. என்னடாதுன்னு பக்கத்துல போயி பார்த்தா அசந்து தூங்கிட்டு இருக்குற மாதிரி நடிக்கிறான்"

"நல்லா படிச்சுட்டு இருந்த பையன் இந்த செமஸ்டர்ல மட்டும் நாலு அரியர்ஸ் வச்சிருக்கான். என்ன ஆச்சுடா உனக்குன்னு கேட்டா பதில் பேசாம பொசுக்குன்னு போயி கதவ சாத்திக்கறான். எங்களுக்கு ஒண்ணுமே புரியல. என்னமோ தப்பு நடக்குதுன்னு மட்டும் தெரியுது" 

இப்படிதான் சமீபகாலமா பெத்தவங்க பொலம்பிட்டு இருக்காங்க. இது ஒரு சில பெத்தவங்களோட பொலம்பல் கிடையாது பட்டி தொட்டியில இருக்குற பல லட்சம் பெத்தவங்களட குமுறல்.

இவங்களோட குமுறலுக்கு ஒரே காரணம் 'செல்போன்’. தாயோடும் பேசாத மௌனத்தை நீயே தந்தாய்

'எவன்டா கண்டுபுடிச்சான் இந்த எக்ஸாம, அவன் மட்டும் என் கையில மாட்டுனா'ன்னு படிக்கிற பசங்க கொந்தளிக்குற மாதிரி, கொஞ்ச நாளாவே செல்போன் கண்டுபுடிச்சவன தேடி அலஞ்சுட்டு இருக்காங்க பெத்தவங்க. 

பொண்ணுங்க அடக்க ஒடுக்கமா இருக்கணும்ங்கறதுக்காக குனிஞ்ச தலை நிமிராம நடக்கணும்னு சொல்வாங்க. ஆனா அடக்கத்துக்காக தலை குனிஞ்சு நடக்கற பொண்ணுங்களை விட செல்போன்ல மெசேஜ் அடிச்சுகிட்டே தலைகுனிஞ்சு நடக்குற பொண்ணுங்கதான் இப்ப ஜாஸ்தி. இப்ப இதுல பசங்களும் சேந்துட்டாங்க. குளிக்கும் போது, சாப்பிடும்போது, ரோட்ல நடந்து போகும் போதுன்னு எல்லா நேரத்துலையும் பொண்ணுங்க தலையும் பசங்க தலையும் குனிஞ்சேதான் இருக்கு. இவங்க குனிஞ்சிட்டே இருக்குறத பார்த்தா ஒரு சைடாவே தலை தொங்கிடும் போல இருக்கு.

இளசுங்களோட உள்ளங்கையில இந்த செல்போன் பண்ற அட்டகாசம் இருக்கே அய்யய்யய்யய்யோ... தெரிஞ்சும் தெரியாமலோ டீ-ஏஜ்ல இருக்குற பசங்களும் பொண்ணுங்களும் செல்போன் செயல்பாடுகளுக்கு அடிக்ட் ஆயிடுறாங்க. விடிய விடிய மெசேஜ், நள்ளிரவு ரகசிய கிசுகிசு, ஒரு மணி நேரத்துக்கு மேல மெசேஜோ அழைப்போ வராம போயிட்டா பரிதவிச்சு போறது, அவங்க செல்போனை வேற யாராவது எடுத்துட்டா பதறிப்போயி ஓடிவந்து கைப்பற்றத் துடிக்கும் பரபரப்புன்னு இளசுங்களோட வாழ்க்கையின் ஒரு அங்கமாகவே செல்போன் இருந்துட்டு இருக்கு. அப்பா, அம்மா வாரக்கணக்குல ஊருக்கு போனா கூட அலட்டிகாதவங்க ஒரு மணி நேரம் செல்போன் கையில இல்லைன்னா உயிரையே பறிகொடுத்த மாதிரி ஆயிடுறாங்க.

செல்போன் பயன்பாட்டால் நடந்த சோகமான ஒரு உண்மைச் சம்பவம் இது! 

சில செல்போன்ல ஆண், பெண், கிளி, கார்ட்டூன்னு நாம விருப்பப்படுற மாதிரி நம்ம குரலை மாத்தி பேசுற வசதி இருக்கு. அந்த வசதியை பயன்படுத்தி, தன்னோட நெருங்கிய நண்பன் சித்தார்த்கிட்ட பெண் குரல்ல பேசியிருக்கான் அருண். 'இன்னிக்கு நீ ரொம்ப ஹேண்ட்சமா இருக்க’, 'நான் யாருன்னு மட்டும் கேட்காத, கிக் இல்லாம போயிடும்’, 'இன்னைக்கு சாயங்காலம் நம்ம காலேஜ் கேன்டினுக்கு பச்சை கலர் சுடிதார் போட்டுட்டு வருவேன். பாத்தாலும் சிரிக்காத, நானும் உன்ன கண்டுக்க மாட்டேன்'னு ஆசை வார்த்தைகள்ள பேசியிருக்கான் அருண். 

சித்தார்த் தன்கிட்ட பேசுறது ஒரு பெண்தான்னு நெனச்சு சந்தோஷத்தின் உச்சிக்கே போயிருக்கான். ஒரு கட்டத்துல சித்தார்த் நிஜமாவே அந்த கற்பனை காதலியை காதலிக்க, இந்த விஷயம் அருணுக்கு தெரிய வருது. இதுக்கு மேலையும் விளையாடினோம்னா சீரியஸ் ஆயிடும்ன்னு நெனச்சு அருண் சித்தார்த்கிட்ட உண்மையைச் சொல்லியிருக்கான். 

ஆனால், அருண் பொறாமையில பொய் சொல்றான், தன் காதலியை அபகரிக்க பாக்குறான்னு கற்பனைகளை ஓடவிட்டு, மனச் சிதைவுக்கு ஆளாகிட்டான். இன்னைக்கு அவன் நிலைமை படு மோசம். இப்ப அவன் மனநல மருத்துவமனைல இருக்கான்!

இது வெறும் சாம்பிள் சம்பவம்தான். இன்னமும் நாம் எதிர்பார்க்கவே முடியாத பிரச்னைகளுக்குள்ள மாட்டிகிட்டு தவிச்சிட்டு இருக்காங்க இளைஞர்கள். எல்லாத்துக்கும் காரணம் செல்போன்! செல்போன்!! செல்போன்!!!

இப்பல்லாம் டீன் - ஏஜ் ஆரம்பிக்கறதுக்கு முன்னாடியே குழந்தைங்ககிட்ட செல்போன் குடுத்து பழக்கி வச்சுடுறாங்க. பதிமூணு வயசு பையன் மாசத்துக்கு பத்தாயிரம் இருபதாயிரம்னு மெசேஜ் அனுப்புற மாதிரியான பூஸ்டர் கார்டை போட்டு, முப்பது நாள் முடியறதுகுள்ளையே அந்த பூஸ்டர் கார்டை முடிச்சுட்டு, இன்னொரு பூஸ்டர் கார்டு போட்டு மெசேஜ் அனுப்ப ஆரம்பிச்சுடுறான். 

விளையாடாம, சரியா தூங்காம, சாப்பிடாம, அம்மா, அப்பா கூட முகம் குடுத்து பேசாம இப்படியாக நாள் முழுக்க செல்போனை கையில வச்சுகிட்டு மெசேஜ் தட்டிகிட்டே இருக்குற வாழ்க்கை முறையிலதான் 'இந்தியாவின் வருங்காலத் தூண்கள்' இப்ப வாழ்ந்துகிட்டு இருக்காங்க.

இவங்க எப்பவும் செல்போனே கதின்னு இருக்காம ஒரு நாளுக்கு எத்தனை மணி நேரத்தை செல்போனுக்காக செலவு செய்யலாம்னு திட்டமிட்டு நேரத்தை செழவழிக்க கத்துக்கணும். விழிப்புடன் இருக்குற சமயத்துல ஒரு நாளைக்கு சில மணி நேரங்களையாவது 'நோ செல்போன் ஹவராக’ கழிக்க கத்துக்கணும்.

செல்போன் பயன்பாடு அதிகரிக்க அதிகரிக்க நாளுக்குநாள் மனிதனோட மூளை மழுங்கிட்டேதான் வருது. எத்தன பேருக்கு நம்ம வீட்டோட லேண்ட்லைன் நம்பர், ஃப்ரண்ட்ஸ் மற்றும் சொந்தக்காரங்க நம்பர் ஞாபகத்துல இருக்குதுன்னு கொஞ்சம் யோசிச்சு பாருங்க. இன்னும் பலருக்கு அவங்களோட பர்ஸனல் நம்பரே ஞாபகத்துல இருக்காதுங்கறதுதான் வேதனையான விஷயம். வெளிய போயிருக்குற சமயத்துல செல்போன் சார்ஜ் இல்லாம சுவிட்ச் ஆஃப் ஆயிடுச்சுன்னா, போச்சு! அவ்வளவுதான்... வெளி உலகத்துடனான அவங்களோட தொடர்பு பவர்கட் ஆகுற மாதிரி டப்புன்னு கட் ஆகிடும். இப்படி 'செல்'லரிச்சு போயிட்டிருக்கு இளைய சமுதாயம்.

செல்போன்ங்கறது நாம மத்தவங்ககிட்டயும், மத்தவங்க நம்மகிட்டையும் பேசுறதுக்கு பயன்படுற ஒரு தகவல் தொடர்புசாதனம்தான். ஆனா கீபேட் தேய, கட்டை விரல் நோக, நிமிஷத்துக்கு நூறு மெசேஜ் பறக்க விடுறது, நைட் தூங்கும்போது போர்வைக்குள்ள மொபைல ஒளிச்சு வச்சு நைட் ஃபுல்லா மெசேஜ் அனுப்பி பார்வை கோளாறு உண்டு பண்ணிக்கறது, மணிக் கணக்கில் பேசி பேசி காதை டமாரமாக்கிக்கறதுன்னு பிறருடனான நம்மளோட தகவல் தொடர்பு அங்கங்களை நாமளே ஊனமாக்கிக்கிறோம். அதனால செல்போன் பயன்பாட்டில் மட்டுமே கவனத்தை சிதற விடாம, நல்ல நல்ல சிந்தனைகள்ள எண்ணங்களை சிறகடிக்க விட்டா நாமளும் நல்லா இருக்கலாம். நம்மள பெத்தவங்களும் சந்தோஷமா இருப்பாங்க!

ஃபைனான்ஷியல் பிளானிங்: பேச்சுலர்களுக்கு..!

மனித வாழ்க்கையை நான்கு விதமாகப் பிரிக்கிறார்கள் ஃபைனான்ஷியல் பிளானர்கள். வேலை கிடைத்து திருமணமாகிற வரையிலான பேச்சுலர் வாழ்க்கை முதல் பாகம், திருமணமாகி குழந்தைகள் வளர்ப்பது வரை இரண்டாம் பாகம், அவர்களுக்கான சொத்து பத்து சேர்த்து வைப்பது மூன்றாம் பாகம், ஓய்வு காலத்திற்கு திட்டமிடுவது நான்காம் பாகம்...

இதில் மிகவும் முக்கிய மானது 23 - 27 வயது வரை உள்ள இளைஞர் பருவம். இந்த வயதில் சரியாக நிதித் திட்டமிடல் செய்பவர்கள் கடைசி காலத்தில் காலாட்டிக் கொண்டே வாழ்க்கையை அனுபவிப்பார்கள். 'லைஃப்-ஐ அனுபவிக்கணும்டா’ என்று டயலாக் விடுபவர்கள், திருமணமான பிறகு இ.எம்.ஐ.

சிக்கலில் மாட்டி பரிதவிப் பார்கள்! இந்த சிக்கலைத் தவிர்க்க 23 -27 வயதுள்ள இளைஞர்கள் தங்கள் நிதித் திட்டமிடலை எப்படி அமைத்துக் கொள்ள வேண்டும் என்று சொல்கிறார் நிதி ஆலோசகரான ஹரிணி.

பேச்சுலர்ஸ்!

23 - 27 வயதுள்ள இளைஞர்கள், இளம்பெண்கள் இதுவரை அப்பா தந்த பாக்கெட் மணியையும், அம்மாவிடம் நைஸாகப் பேசி வாங்கிய பணத்தையும் வைத்து செலவு செய்து வந்திருப்பார்கள். ஆனால், கையில் முதல் மாதச் சம்பளம் கிடைத்தவுடன் கண்ணில் பட்ட அனைத்தையும் வாங்க நினைப்பார்கள். முதல் சம்பளத்தில் அப்பா, அம்மா, அக்கா, தம்பிகளுக்குப் பிடித்ததை வாங்கித் தருவதோடு, நண்பர்களுக்கு ட்ரீட்டையும் தந்துவிட்டு, நிதித் திட்டமிடலை தொடங்கி விடலாம்.

இன்ஷூரன்ஸ்!

படித்து முடித்து வேலைக்குப் போனதும் ஆணோ, பெண்ணோ முதலில் இன்ஷூரன்ஸ் பாலிசி எடுத்துக் கொள்ள வேண்டும். 'இன்ஷூரன்ஸா, அதுவும் ஓடுற பாம்பை கையில பிடிக்கிற இந்த வயசிலேயேவா?’ என்று கேட்கத் தோன்றும் வயது இது. ஆனால், இன்ஷூரன்ஸ் பாலிசியை எவ்வளவு குறைவான வயதில் எடுக்க முடிகிறதோ, அவ்வளவு குறைவான வயதில் எடுத்தால் குறைந்த பிரீமியத்தில் அதிக கவரேஜ் பெறலாம். தவிர, இளவயதில் பெரிய நோய் ஏதும் வருவதற்கு வாய்ப்பில்லை என்பதால் அது தொடர்பான ரைடர் பாலிசிகளையும் தவிர்த்து விடலாம்.

இந்த வயதுடையவர்கள் தங்கள் வருமானத்தைப் போல பத்து மடங்குக்கு பாலிசி எடுத்துக் கொள்வது நல்லது. இன்ஷூரன்ஸ் என்ற வுடனே எல்லோரும் எண்டோவ்மென்ட் பாலிசிகளையே எடுக்கிறார்கள். இந்த வயதுக்காரர்களுக்கு எண்டோவ்மென்ட் பாலிசிகளைவிட டேர்ம் இன்ஷூரன்ஸ் பாலிசிகளே பொருத்தமானதாக இருக்கும். திருமணமான பிறகு தேவைப்பட்டால் மட்டும் எண்டோவ்மென்ட் பாலிசிகளை எடுக்கலாம்.

இந்த வயதில் உள்ளவர்களுக்கு பெரிய நோய் எதுவும் வராது என்றாலும், மெடிக்ளைம் பாலிசி எடுப்பது அவசியம். தன்னோடு தன் பெற்றோர்களுக்கும் சேர்த்து எடுக்கலாம். வேலை காரணமாக இரு சக்கர வாகனத்தில் அடிக்கடி பயணம் செய்பவர்கள் கூடுதல் கவரேஜில் மெடிக்ளைம் பாலிசி எடுப்பது அவசியம். இன்ஷூரன்ஸ் பாலிசிகளை எடுப்பதன் மூலம் நம்மை நம்பி இருப்பவர்களை நட்டாற்றில் விடத் தேவையில்லை என்பதோடு, வரிச் சலுகையும் கிடைக்கும் என்பது முக்கியமான விஷயம்.

ரியல் எஸ்டேட்!

இப்போதைய இளைஞர்கள் அனைவரும் சம்பளம் வாங்க ஆரம்பித்தவுடனே வீடு, நிலம் வாங்க புறப்பட்டு விடுகிறார்கள். 23, 24 வயதில் வேலைக்குச் சேர்ந்து டிரெய்னிங் பீரியட், புரஃபேஷன் பீரியட் என பல கட்டங்களைத் தாண்டி வர வேண்டும். இந்த காலகட்டத்தில் ஏதாவது ஒரு பிரச்னையால் வேலை இழக்க வாய்ப்புண்டு. எனவே, வேலை உறுதியாகும் வரை ரியல் எஸ்டேட்டில் முதலீடு செய்யாமலிருப்பது நல்லது. குறைந்தபட்சம் மூன்று வருடங்களாவது எந்தவிதமான தனிநபர் கடனோ, வீட்டுக் கடனோ வாங்காமல் இருக்க முயற்சிக்க வேண்டும்.

இதற்காக ரியல் எஸ்டேட் பற்றி யோசிக்கவே வேண்டா மென்று சொல்லவில்லை. எவ்வளவு தொகைக்கு வீடு அல்லது மனை வாங்கப் போகிறீர்கள் என்று தீர்மானித்துவிட்டு அதற்குத் தேவையான தொகையில் கால் சதவிகிதத்தைச் சேமிப்பது நல்லது. உதாரணத்திற்கு, இருபது லட்சம் ரூபாய்க்கு வீடு வாங்க ஆசைப்பட்டால் ஐந்து லட்சம் ரூபாய் வரை சேமித்துவிட்டு, மூன்று வருடங்கள் கழித்து யாரிடமும் கைநீட்டாமல், அதுவரை சேமித்து வந்த சொந்தப் பணம் மற்றும் வங்கிக் கடன் மூலம் வீடு வாங்கலாம்.

இந்த வயதில் உள்ளவர்கள் வீட்டுக் கடன் வாங்கும்போது எவ்வளவு ரூபாய்க்கு கடன் வாங்குகிறார்களோ, அந்த தொகைக்கு இணையான இன்ஷூரன்ஸ் பாலிசியை எடுப்பது அவசியம். ஏனெனில், கடன் வாங்கிய பிறகு ஏதாவது அசம்பாவிதம் நடந்து கடன் கட்ட முடியாமல் போனால், பெற்றோர்கள் கஷ்டப்பட்டு அந்த கடன் பணத்தைக் கட்ட வேண்டியிருக்கும். ஆனால், இந்த பாலிசி எடுத்தால், பெற்றோர்கள் பணம் எதையும் கட்டாமலே அந்த வீட்டின் உரிமையை தக்கவைத்துக் கொள்ள முடியும். 

தங்கம்!

இளம்பெண்கள் திருமணத்திற்குப் பிறகு கணவன் இருக்குமிடத்திற்குப் போயாக வேண்டும் என்பதுதான் நடைமுறையில் இருக்கிறது. இந்நிலையில் திருமணத்துக்கு முன்பாக வீடு வாங்கியிருந்தால் அதனால் சில சிரமங்கள் ஏற்படலாம். ஒருவேளை திருமணத்திற்குப் பிறகு வேலைக்குச் செல்ல முடியாதபட்சத்தில் அந்த வீட்டுக்கான கடன் சுமை கணவனின் தலையில்தான் விழும். எனவே, இளம்பெண்கள் வேலைக்குச் சேர்ந்ததும் ஹவுஸிங் லோனில் ஃபிளாட் வாங்குவதைத் தவிர்ப்பது நல்லது. அதற்குப் பதில் தங்கத்தில் தாராளமாக முதலீடு செய்தால், திருமணத்தின்போதும், திருமணத்திற்குப் பிறகும் நிச்சயம் உதவும். ஆபரணமாகத்தான் தங்கம் வாங்க வேண்டும் என்பதில்லை. கோல்டு இ.டி.எஃப்., கோல்டு சேவிங்ஸ் ஃபண்ட் திட்டங்கள் மூலமும் சேமிக்கலாம்.

மியூச்சுவல் ஃபண்ட்!

ஆண், பெண் என இரு தரப்பினருக்குமே மிகவும் ஏற்றது மியூச்சுவல் ஃபண்ட் முதலீடு. எஸ்.ஐ.பி. முறையில் நல்ல வருமானம் தரும் ஃபண்டுகளில் முதலீடு செய்யலாம். மன்த்லி இன்கம் குரோத் பிளானில்கூட முதலீடு செய்து வரலாம். சில நிறுவனங்களில் மன்த்லி இன்கம் பிளானில் தங்கத்தில் சில சதவிகிதங்கள் முதலீடு செய்யும் திட்டங்களும் இருக்கின்றன. அதுபோன்ற திட்டங்களில் முதலீடு செய்யலாம். ஃபண்டில் கிடைக்கும் டிவிடெண்ட் தொகைக்கு வரி கட்ட வேண்டியதில்லை.

வங்கி டெபாசிட்!

வங்கி டெபாசிட்டில் முதலீடு செய்தால், போட்ட பணத்திற்கு வேண்டுமானால் பாதுகாப்பு கிடைக்கலாம். ஆனால், பணவீக்கத்தைவிட குறைந்த வருமானமே கிடைக்கும். ஓரளவுக்கு ரிஸ்க் எடுத்தாலும் பிரச்னை இல்லை என்கிற இந்த வயதில் வங்கி டெபாசிட் என்பது வீண்தான்!

பங்குகள்!

ரிஸ்க் எடுக்கும் வாய்ப்புகள் கொண்ட இளைஞர்கள், பங்குச் சந்தையில் துணிந்து முதலீடு செய்யலாம். 50,000 சம்பளம் வாங்குபவர்கள் மாதம் 5,000 ரூபாய் வரை பங்குகளில் முதலீடு செய்யலாம். நல்ல லார்ஜ்கேப் பங்குகள், புளூசிப் கம்பெனி பங்குகளாகப் பார்த்து நீண்ட காலத்திற்கு வாங்கிப் போடலாம். சந்தை கீழே இறங்கும்போது கூடுதலாக பங்குகள் வாங்கிச் சேமித்தால் நீண்ட கால அடிப்படையில் நல்ல பலன் கிடைக்கும். 

மற்ற முதலீடுகள்!

வங்கி டெபாசிட்கள் 8.5 -10% வட்டி தருகிறது என்றால், கம்பெனி டெபாசிட்கள் 10.5 - 12.5% வரை வட்டி தருகின்றன. நல்ல நிவாகம், அதிக ரேட்டிங், மிகவும் வலுவான நிதிநிலை கொண்டுள்ள கம்பெனி டெபாசிட்டுகளாகப் பார்த்து போடலாம். அத்துடன் பங்குகளாக மாற்ற முடியாத டிபஞ்சர்களில்கூட முதலீடு செய்யலாம். பப்ளிக் பிராவிடெண்ட் ஃபண்டில் வருடத்திற்கு 70,000 ரூபாய் வரையில் சேமிக்கலாம். பங்குகளில் பணத்தை முதலீடு செய்ய விரும்பாத பெண்கள், தேசிய சேமிப்புப் பத்திரம் போன்ற ரிஸ்க் அல்லாத முதலீடுகளில் நீண்ட காலத்திற்குச் சேமிக்கலாம்.

காற்றுள்ள போதே தூற்றிக் கொள் என்கிற மாதிரி வயதிருக்கும் போதே நிறைய சேமித்து, சரியாக முதலீடு செய்வது அவசியம் என்பதை இளைஞர்களும், இளம்பெண்களும் புரிந்து கொண்டால் சரி.

- நாணயம் விகடன்

தமிழகத்தில் சொத்து வைத்திருப்போர் கவனத்துக்கு..!

பத்திரப் பதிவு - அரசு வழிகாட்டி மதிப்புக்கான வரைவு திருத்தம்

தமிழ்நாட்டில் கடந்த 2007 ஆம் ஆண்டுக்கு பிறகு அரசு வழிகாட்டி மதிப்பு என்கிற கைடு லைன் வேல்யூ அதிகரிக்கப்படாமல் இருந்தது. புதிய அரசு, அதன் பல்வேறு திட்டங்களுக்கு நிதி பற்றாக்குறை வரவே... இப்போது சுறுசுறுப்பாக மாநிலம் முழுக்க உள்ள ஒரு கோடி சர்வே எண்களுக்கான புதிய வழிகாட்டி மதிப்பை நிர்ணயிக்கும் வேலையில் இறங்கி இருக்கிறது. 

மனை மற்றும் வீட்டை பத்திரப் பதிவு செய்பவர்கள் அதன் அரசு வழிகாட்டி மதிப்பில் (8 சதவிகிதம் முத்திரைத் தாள் கட்டணம், ஒரு சதவிகிதம் பதிவுக் கட்டணம்) 9 சதவிகிதத்தை கட்டணமாக செலுத்த வேண்டும். பெரும்பாலும் சந்தை மதிப்புக்கும் அரசு வழிகாட்டி மதிப்பும் இடையே வித்தியாசம் இருக்கும்.

தற்போது சந்தை மதிப்பு மற்றும் அரசு வழிக்காட்டி மதிப்பு இணையாக இருக்கும்படி அரசு புதிய வழிகாட்டி மதிப்பை நிர்ணயிக்கும் முயற்சியில் இறங்கி இருக்கிறது. பல இடங்களில் தற்போதுள்ள வழிகாட்டி மதிப்பை விட சுமார் 10 மடங்கு அதிகரிக்கப்பட்டிருக்கிறது. அதாவது இப்போது ஒருவர் பத்திரப் பதிவுக்காக 20 ஆயிரம் ரூபாய் செலவிட்டால், இனி 2 லட்ச ரூபாய் செலவிட வேண்டி வரும்..!

இதற்கான வரைவு வழிகாட்டி மதிப்பு, புத்தகமாக தயாரிக்கப்பட்டு தமிழகம் முழுக்க பத்திரப் பதிவு அலுவலகங்களில் பொதுமக்கள் பார்வைக்கு வைக்கப்படிருக்கிறது. மேலும், தமிழக அரசின் பதிவுத் துறை இணையத்தளத்திலும் வெளியிடப்பட்டிருக்கிறது. (இணைப்பு :

http://www.tnreginet.net:80/DraftGuideline2011/gvaluemainpage2011.asp)

இதில், சந்தை மதிப்பை விட அதிகமாக அரசு வழிகாட்டி மதிப்பு நிர்ணயிக்கப்பட்டிருக்கிறது என்றால், அதை குறைக்கச் சொல்லி அரசுக்கு மனு கொடுக்கலாம். சாலை, குடிநீர், தெரு விளக்கு, பஸ் வசதி போன்ற உள்கட்டமைப்பு வசதிகள் இல்லாத இடத்துக்கு அதிகமாக மதிப்பு நிர்ணயிக்கப்பட்டிருந்தால் அரசு வழிகாட்டி மதிப்பை குறைக்க நடவடிக்கை எடுக்கப்படுகிறது. வரைவு வழிகாட்டி மதிப்பு டிசம்பர் 15 ஆம் தேதிக்குள் இறுதி செய்யப்பட இருக்கிறது. 

இந்த வழிகாட்டி மதிப்பை பார்த்து சரிதானா என்பதை உறுதிப்படுத்திக் கொள்வது சொத்து வைத்திருக்கும் மற்றும் விரைவில் வாங்கப் போகும் அனைவரின் கடமையும் கூட..!

ஏன் சரிபார்க்க வேண்டும் என்பதற்கான விளக்கம் சிறிய உதாரணமாக தருகிறேன். 

ஒரு ஏரியாவுக்கு தவறுதலாக அரசு வழிகாட்டி மதிப்பு, மிக அதிகமாக நிர்ணயிக்கப்பட்டால் பாதிப்பு அந்த பகுதில் சொத்து வைத்திருக்கும் மற்றும் வாங்கப் போகிற இருவருக்கும்தான். எடுத்துக்காட்டாக ஒரு இடத்தின் அரசு வழிகாட்டி சதுர அடிக்கு 3,000 ரூபாயாக நிர்ணயிக்கப்பட்டிருக்கிறது. ஆனால், உள்கட்டமைப்பு வசதி எதுவும் இல்லாத அந்த இடத்தின் மார்க்கெட் விலை 1000 ரூபாய்தான். இந்த ஒரிஜினல் மதிப்புபடி 1,000 ச.அடி மனையின் விலை 10 லட்ச ரூபாய். இதற்கு முத்திரை மற்றும் பதிவு கட்டணம் 9% என்பது 90,000 ரூபாய். ஆனால், அரசு வழிகாட்டி மதிப்பு 3000 ரூபாய் என்கிற போது, 1000 ச.அடி. மனைவின் மதிப்பு 30 லட்ச ரூபாயாகிவிடுகிறது. இதற்கான பத்திரப் பதிவு செலவு 4.5 லட்ச ரூபாயாக இருக்கும். அதவாவது, 10 லட்ச ரூபாய் இடத்துக்கு 4.5 லட்ச ரூபாய் பதிவு கட்டணம் என்றால் என்ன செய்வது?

இடத்தை விற்பவர் கணிசமாக விலையை குறைத்து கொடுத்தால் மட்டுமே வாங்குவார்கள். அப்படி நடக்கவில்லை என்றால், கடைசி வரைக்கும் சொத்து கைமாறுவது என்பதே இருக்காது. எனவே, அரசு வழிகாட்டி மதிப்பு இறுதி செய்யப்படுவதற்குள், அனைவரும் அவர்களின் சர்வே எண் அல்லது தெருவுக்கு என மதிப்பு நிர்ணயிக்கப்பட்டிருக்கிறது என்பதை பார்த்து மறுப்பு தெரிவித்து சரிசெய்வதே செய்ய வேண்டிய காரியம்.

எனவே, மறந்தும் இருந்துவிடாதீர்கள். இருந்தும் மறந்துவிடாதீர்கள்..!

'கொலவெறி' பாடலுக்கு அமிதாப் வாழ்த்து!

தனுஷ் எழுதி பாடியுள்ள ' WHY THIS KOLAVERI DI ' பாடல் தற்போது தமிழக இளைஞர்களிடையே வரவேற்பை பெற்றதோடு மட்டுமல்லாமல் தற்போது வலைதளங்கள் மூலம் மிகப் பிரபலமாக உள்ளது.

'WHY THIS KOLAVERI DI ' பாடல் டிவிட்டர் இணையத்தின் TRENDINGல் இந்தியாவில் முதல் இடத்தில் இருக்கிறது.

YOUTUBE இணையத்தின் TRENDING-லும் இப்பாடல் தற்போது முதல் இடத்தில் இருந்து வருகிறது. இதுவரை YOUTUBEல் 17,90,827 பார்த்து இருக்கிறார்கள். ஒரு தமிழ் பாடலுக்கு இதுவரை இல்லாத அளவிற்கு இந்த பாடலுக்கு வரவேற்பு கிடைத்துள்ளது. 

இந்த பாடலுக்கு கிடைத்த வரவேற்பால், இந்தி சேனல்கள் செய்திகளை வெளியிட்டு வருகிறார்கள். அவர்கள் ' KOLAVERI BECOMES A VIRAL IN INDIA ' என்று கருத்து தெரிவித்து இருக்கிறார்கள். 

இந்தி எஃப்.எம் களும் தற்போது இந்த பாடலை ஒளிபரப்பி வருகிறார்கள். இது வரை எந்த ஒரு பாடலும் செய்யாத சாதனையை இந்த பாடல் அடங்கிய YOUTUBE வீடியோ செய்துள்ளது. 

YOUTUBEல் "POPULAR VIDEOS AROUND THE WEB" ல் ஒரு தமிழ் பாடல் முதன் முறையாக 10வது இடத்தை பிடித்துள்ளது. ஒவ்வொரு நாளும் இந்த ஒரு பாடல் ஒவ்வொரு சாதனை செய்து புகழ்ச்சியில் வளர்ந்து வருவதால் சந்தோஷத்தில் திக்குமுக்காடி வருகிறது 3 படக்குழு. 

இப்பாடலை கேட்ட இந்தி முன்னணி நடிகரும் ரஜினியின் நெருங்கிய நண்பருமான அமிதாப் பச்சன் " கொலவெறி பாடலை பற்றிய பேச்சாக இருந்ததால் அப்பாடலை கேட்டேன். அருமையாக இருந்தது. தனுஷ் மற்றும் ஐஸ்வர்யா தனுஷிற்கு எனது வாழ்த்துக்கள் " என்று தெரிவித்துள்ளார்.

இந்தியாவின் முன்னணி நடிகராக இருக்கும் அமிதாப்பச்சனின் இந்த வாழ்த்து செய்திக்கு படக்குழு தனது நன்றியை தெரிவித்டுள்ளது. இப்படத்தின் அறிமுக இசையமப்பாளர் அனிருத்தை தங்கள் படங்களுக்கு ஒப்பந்தம் செய்ய பல இயக்குனர்கள் ஆர்வமாக உள்ளனர்.

கலாசார மாறுதல்களை சமாளிப்பது எப்படி?

உறவுகளையும், குடும்பத்தையும் ஒருசேர பேலன்ஸ் செய்வது என்பது அவ்வளவு சாமான்யமான விஷயமில்லை!

இன்று இந்தியா ஒரு அதிவேக வளர்ச்சியில் உள்ளது. இந்த வளர்ச்சியை நீங்கள் உங்கள் சம்பளத்திலும், வாழ்க்கைத் தரம் உயர்வதிலும் நன்றாகவே பார்க்கலாம். 

இந்த வளர்ச்சிகளெல்லாம் நல்லதுதான்! இருப்பினும் இந்த வளர்ச்சியின் காரணமாக இன்றைய தலைமுறையினர் சில கலாசார பிரச்னைகளையும் எதிர்கொள்ள வேண்டியிருக்கிறது. அவற்றை சரியாக அணுகித் தீர்வு காணாமல், நிம்மதி இழந்து தவிப்பவர்கள் பலர். இந்த கலாசார பிரச்னைகளுக்கு எப்படி தீர்வு காண்பது என்பது பற்றி பார்ப்போம்.

1. மகன்/மகளிடம் அதிக பணத்தை எதிர்பார்க்கும் பெற்றோர்கள்!

சில வருடங்களுக்கு முன்பு, என் நண்பரின் நண்பர் ஒருவர் 35 வயதில் இறந்தார். அவருக்கு இரண்டு குழந்தைகள். மகன் உயிருடன் இருக்கும்போது கணக்குவழக்கு இல்லாமல் பெற்றோருக்குப் பணம் தந்தார். அப்பணத்தை வாங்கி பெற்றோர்கள் உல்லாசமாக செலவு செய்தனர். மகன் இறந்தவுடன், அவருடைய மனைவிக்கு இன்ஷூரன்ஸ் பணமெல்லாம் வந்தது. அதிலிருந்து ஒரு பெரும் தொகையை அவரது பெற்றோர் கேட்டனர். ஆனால், மருமகளோ தருகிற மாதிரி இல்லை. இத்தனை நாளும் மகனை நம்பி வாழ்ந்தவர்கள், அடுத்து வேறு மாதிரிதான் நிலைமையைச் சமாளித்தனர்.

பெற்றோர்களை பார்த்துக் கொள்ள வேண்டியது குழந்தைகளின் கடமைதான். ஆனால், பெற்றோர்கள் தங்கள் தேவைக்கு அதிகமாக குழந்தைகளிடம் இருந்து எதிர்பார்ப்பது தவறு. அத்தியாவசிய செலவுக்கு மட்டும் பணம் கிடைக்கும்; ஆடம்பரமான வாழ்க்கை வாழ தர வாய்ப்பில்லை என்பதை மகனோ / மகளோ நாசூக்காகச் சொல்லிவிடுவது நல்லது.

2. சகோதர சகோதரிகளின் குழந்தைகளைப் படிக்க வையுங்கள்!

ஒருவருக்கு கல்விக் கண்ணை திறந்து வைப்பது என்பது மிகவும் உன்னதமானச் செயல். ஆகவே, உங்கள் சகோதர, சகோதரிகளின் குழந்தைகளுக்கு தாராளமாக உதவி செய்யுங்கள். உங்களால் முடியாத பட்சத்தில், வங்கிகள் மூலம் கல்விக் கடன் பெற்றுக் கொடுப்பதற்கு உதவி செய்யுங்கள். எக்காரணத்தைக் கொண்டும் நேரடியாக பணம் தந்து அவர்களை சோம்பேறி ஆக்கிவிடாதீர்கள்.

3.என் குடும்பமா? என் பெற்றோரா?

சிலர், தான் அமெரிக்காவில் ஏ.சி. போன்ற வசதிகளுடன் வாழ்கிறோம்; ஆனால், தமது பெற்றோர்கள் அந்த வசதியை அனுபவிப்பதில்லையே என்ற குற்ற உணர்வில் அமெரிக்காவில் தன்னுடன் இருக்கும் குடும்பத் தினருக்குப் பார்த்துப் பார்த்து செலவு செய்துவிட்டு, இந்தியா வில் இருக்கும் பெற்றோருக்கு அவர்களின் தேவைக்கும் அதிகமான அளவு பணத்தை அனுப்பி விடுகிறார்கள். பெற்றோர்களின் தேவைகளை கவனிக்க வேண்டும் என்றாலும், தன்னுடன் இருக்கும் குடும்பத் தினருக்கும் முன்னுரிமை தர வேண்டும்.

4. காற்றுள்ள போதே தூற்றிக் கொள்ளுங்கள்!

ஒவ்வொருவரின் வாழ்க்கை யிலும் 'க்ரீம் பீரியட்’ என்று சொல்லக்கூடிய (25 வயதில் இருந்து 50 வயது வரை) காலகட்டத்தில் சொந்தபந்தம் அனைத்திற்கும் உழைத்துவிட்டு, 50 வயதிற்கு மேல் தனக்கும் தன் குடும்பத்திற்கும் ஒன்றும் செய்யவில்லையே என்று கவலையோடு அலைவது கொடுமையான விஷயம்! 'க்ரீம் பீரியடில்’ சொந்தபந்தங்களுக்கு தாராளமாக உதவுங்கள். அதே சமயத்தில் உங்களின் எதிர்காலத் தேவைகளான ரிட்டையர்மென்ட், குழந்தைகள் கல்வி மற்றும் திருமணம், வீடு வாங்குதல் போன்றவற்றிற்காகவும் சேமியுங்கள்; முதலீடு செய்யுங்கள். உறவினர் களுக்குப் பயந்து, உங்கள் பாதுகாப்பை கேள்விக் குள்ளாக்கி விடாதீர்கள்.

5. பெற்றோர்களுக்குத் தேவை அன்பு! 

பெற்றோர்கள் நம்மிடம் இருந்து எதிர்பார்ப்பது நமது அன்பைத்தான். அதை தாராளமாகக் கொடுங்கள். இன்றைய காலகட்டத்தில் பல வசதிகளுடன் ரிட்டையர்மென்ட் ஹோம்கள் வந்துவிட்டன. பல சீனியர் சிட்டிஸன்ஸ் அவர்களாகவே முதியோர் இல்லத்திற்குச் சென்று செட்டிலாகிறார்கள். ஆக, பெற்றோர்கள் சொந்த வீட்டில் இருந்தாலும், முதியோர் இல்லத்தில் இருந்தாலும் அவர்களிடம் வஞ்சனை இல்லாமல் அன்பு காட்டுங்கள். அந்த அன்பு ஒன்றே அவர்களை மகிழ்ச்சியாக வாழ வைக்கும்.

6. ஆங்கில மொழியை கற்றுக் கொள்ளுங்கள்!

இன்றைக்கு சென்னையில் வேலை பார்க்க வரும் பிற மாவட்டங்களைச் சேர்ந்த இளைஞன் ஒருவன், முதலில் பயப்படுவது நாலு பேரிடம் தைரியமாக ஆங்கிலத்தில் எப்படி பேசுவது என்பதற்குத்தான். ஆங்கிலத்தில் சரளமாக பேச / எழுத மற்றும் கம்யூனிகேஷன் ஸ்கில்ஸை கற்றுத் தரும் அமைப்புகள் இன்று சென்னையிலும் பிற நகரங்களிலும் எத்தனையோ வந்துவிட்டன. மொழியையும் கம்யூனிகேஷன் திறமையையும் வளர்த்துக் கொள்ள நீங்கள் செலவு செய்யும் பணத்தை ஒரு முதலீடாக கருதுங்கள். இதற்காக பணம் செலவழிக்கத் தயங்காதீர்கள்! கம்யூனிகேஷனில் நீங்கள் ஸ்ட்ராங்காகிவிட்டால், தன்னம்பிக்கை உங்களுக்குத் தானாகவே வரும்.

7. இரண்டு குழந்தை பெறுவது தவறா?

சிலர் ஒன்றிரண்டு குழந்தை களை பெற்றுக் கொண்டால், தான் உறவினர்களுக்குச் செய்யும் பண உதவி நின்றுவிடுமோ என்று அஞ்சி குழந்தை பெற்றுக் கொள்வதைகூட ஒத்திப் போடுகிறார்கள். இது அர்த்தமற்ற பயமாகும். குழந்தைகள் பெற்றுக் கொள்ளாவிட்டால், நமது வாழ்க்கை பூரணமடையாது! பிறருக்கு உதவி செய்வது நின்றுவிடுமே என்பதற்காக குழந்தை பெற்றுக் கொள்ளாமல் இருப்பது முட்டாள்தனம்! எனவே, காலகாலத்தில் குழந்தைகளை பெற்றுக் கொண்டுவிடுங்கள்.

8. அதிக செல்லம், அதிக கெடுபிடி வேண்டாமே! 

நாம் குழந்தையை அதிகம் செல்லம் கொடுத்து வளர்க் கிறோம். இல்லாவிட்டால் அதிக கெடுபிடி தந்து நம் ஆசைகளை குழந்தைகள் மீது திணிக்க ஆரம்பிக்கிறோம். நீங்கள் எதிர்பார்த்ததற்கு நேர்எதிர் மாறான விளைவைத்தான் இது உருவாக்கும். நீக்குபோக்குடன் குழந்தையை வளர்த்தால் அவன் முழுமையான மனிதனாவான்.

9. வெளிநாட்டு படிப்பு தேவையா?

குழந்தைகளை 12-ம் வகுப்புவரை படிக்க வைப்பது பெற்றோரின் கடமை. அதற்கு மேல் ஒருபடி சென்று நாம் காலேஜிற்கும் பணம் கட்டுகிறோம். காலேஜ் முடித்தவுடனேயே ஒரு குழந்தை முழு மனிதனாக மாறி விடுகிறான். அதற்கு மேல் உங்கள் குழந்தை தன்னைத் தானே கவனித்துக் கொள்ள ஏதுவாகி விடுகிறான். முதுகலைப் படிப்பிற்கு உங்களிடம் நிறையப் பணம் இருந்தால் தாராளமாக கொடுத்து உதவி செய்யுங்கள்.

ஆனால், ரிட்டையர்மென்ட் பணத்தைக் கொடுத்து வெளிநாட்டிற்குப் படிக்க அனுப்புவது முட்டாள்தனம். தவிர, அமெரிக்கா, ஐரோப்பா, ஆஸ்திரேலியா போன்ற வளர்ந்த நாடுகளில் வேலைவாய்ப்பு குறைந்துவிட்டது. எனவே, உங்கள் குழந்தை அங்கு படித்தாலும், இந்தியாவில்தான் வேலை செய்ய வேண்டியிருக்கும் என்பதை மறக்காதீர்கள்.

10. தொழிலோடு குடும்பத்தையும் கவனியுங்கள்!

வீட்டைக் கண்டு கொள்ளாமல் நான் நெட்வொர்க்கிங் செய்கிறேன்/ சமூக சேவை செய்கிறேன்/ தொழிலில் மிகவும் பிஸியாக இருக்கிறேன் என்று கூறுவது இன்றைய நம் குடும்ப உறுப்பினர்கள் நிச்சயம் ஒப்புக்கொள்ள மாட்டார்கள். நாம் அவர்களை கவனிக்கத் தவறினோம் எனில், அவர்கள் ஆதரவுக்கரம் நீட்டுபவர்களின் கைகளில் அடைக்கலம் புக நிறைய வாய்ப்பிருக்கிறது. குடும்பம்தான் கோயில்! குடும்பத்திற்கு முதலிடம் தந்து, மற்றவற்றிற்கு இரண்டாவது இடத்தைக் கொடுங்கள்.

11. கணவன் - மனைவி சம்பாத்தியம்!

கணவன், மனைவி ஆகிய இருவரும் பெரிய பதவிகளில் பெருவாரியாகச் சம்பாதித்து விட்டு, வீட்டில் குழந்தைகளை கவனிக்க முடியாமல் ஆதங்கப்படுகிறார்கள். அந்தக் குறையை நிவர்த்தி செய்ய குழந்தைகளுக்கு நிறைய கிஃப்ட் கொடுக்கிறார்கள் அல்லது மெகா மால்களுக்கு அழைத்துச் சென்று விருப்பப்பட்டதை வாங்கித் தருகிறார்கள். குழந்தை தங்களை தொந்தரவு செய்யாமல் இருக்க ப்ளே ஸ்டேஷன்/ கம்ப்யூட்டர் கேம்ஸ் போன்ற எலெக்ட்ரானிக் சாதனங்களை வாங்கித் தருகிறார்கள். இதனால் அந்த குழந்தைக்கு நீங்கள் நல்லது செய்யவில்லை என்பதை மட்டும் தெரிந்து கொள்ளுங்கள்.

வாழ்வதற்காகத்தான் பணம் சம்பாதிக்கிறோம். ஒவ்வொரு பெற்றோரும் தங்களது குழந்தைகளுக்காக கொடுக்கும் சிறந்த அன்பளிப்பு அவர்களுக்காக ஒதுக்கும் நேரம்தான். அவர்களுடன் முடிந்தவரை சேர்ந்து இருங்கள் - தேவையென்றால் உங்கள் வேலைப் பளுவை குறைத்துக் கொள்ளுங்கள். அதனால் உங்கள் சம்பாத்தியம் குறையும் என்றாலும் பரவாயில்லை!

12. அண்டை வீட்டாரின் பொறாமை வேண்டாம்!

'பியர் பிரஷர்’ - இன்று பரவலாக புழங்கும் வார்த்தை யாக இது மாறிவிட்டது. கூட வேலை செய்பவர் 50 லட்சத் திற்கு வீடு வாங்கிவிட்டார், ஐரோப்பா டூர் போகிறார் என்றாலும், நாமும் அவ்வாறு செய்ய நினைப்பது; அல்லது அப்படி செய்ய முடிய வில்லையே என நொந்து கொள்வது.

ஒவ்வொருவரின் வாழ்க்கை யும் ஒரு விதம். உங்கள் தேவை என்ன என்பதை அறிந்து கொள்ளுங்கள். அதை அடைவதற்கு முயற்சி செய்யுங்கள்! அதைவிட்டு விட்டு அடுத்தவன் பின்னால் நாம் ஓட ஆரம்பித்தால், அது நாம் போய்ச் சேர நினைக்கிற இடத்தில் கொண்டு போய் சேர்க்காது.

- நாணயம் விகடன்